Supoño que isto pode parecer algo semellante a publicidade, pero despois de todo é o meu blogue persoal, e ben podo contar nel o qué me parecen as cousas.

Veño de contratar, con Dinahosting, un servizo de hospedaxe. Xa contratara antes con eles un rexistro de dominio, e quedara moi satisfeito, e desta vez tamén me causaron moi boa impresión, polos seguintes motivos:

• O soporte técnico é moi, moi veloz, e moi bo. Como proba, un botón: púxenlles un correo ó pouco de contrata-lo servizo de proba (¡ollo! Nen sequera estaba a pagar aínda) preguntando unha dúbida ca conexión segura, e en troques de responder con outro correo, chamáronme persoalmente ó cabo dunha hora e pico, «porque a dúbida non é moi habitual, e por se tiñas algunha outra». Ah, e era sábado.
• Permiten acceso ao servidor por SSH, o que non ven sendo moi habitual.
• Teñen a páxina web en galego (e tamén en castelán, e en portugués, e en checo). Algo que me importa menos, pero tamén, é o feito de que usan as terminacións en 'bel' e, para os correos que lles mandas en galego (que por suposto respostan en galego tamén), o enderezo ten o sufixo '-gz'. A bo entendedor...En contra, debo dicir que aínda non teñen a axuda en liña traducida ó galego. Supoño que hai que lles dar tempo.
• Por se o anterior fose pouco, fan bandeira do compromiso ca língoa, como se pode ver na imaxe que segue. Tamén me pareceu moi positivo un pequeno detalle da foto (a ver quén mo pode dicir), que representa un guiño moi discreto pero moi claro cara unha sociedade muito mais razoable.

Vamos, que estou contento con eles. E ademais, aínda os prezos son bastante bos, penso.