Fai algún tempo lín nalgures que cambiando  a interface de almacenamento virtual do sistema operante hospede de IDE, como está por defecto, a SATA melloraba o rendimento do sistema. Incluso o manual de Virtualbox deixa claro que existen melloras tanto na rapidez, coma no consumo de CPU.

Se queres configurar Virtualbox deste xeito e aínda non instalaches o sistema hospede, nin creaches o disco virtual, bastará con que crees un do tipo SATA e que instales o sistema nese disco virtual. E no caso de que xa teñas o sistema instalado so terás que cambiar a configuración do disco virtual de IDE a SATA. Pero lembra que o teu sistema operativo hospede ten que ter soporte para discos sata, e se non terás que instalarllo. No caso de calquera distribución de Linux recente estará soportado de seguro, do único que habería que preocuparse é de que sexa capaz de atopar as particións cando se inicia, e incluso para este caso ó basar esta identificación moitas distros en etiquetas, tampouco debería haber moito problema. Pero n o caso por exemplo dun Windows XP, ou outros Windows, sería preciso baixarse os drivers de Intel. Instalando o aplicativo "Intel Matrix Storage Manager" que podes baixar direitamente da web de Intel, todo debería funcionar corretamente. 

Así que xa sabedes. Se necesitades mellorar o rendimento das vosas máquinas virtuais podedes comezar por pasar os discos virtuais a SATA.

Se non quedou suficientemente claro, tes os pasos explicados con máis detalle no artigo "Improving VirtualBox performance" do Blogue de Matt.