Como bastantes xa saberedes, o goberno do Partido Popular ven de publicar un plano estratéxico para as novas tecnoloxías que, semella, substitúe ao anterior Plano Estratéxico Galego para a Sociedade da Información.

O PEGSI representaba, con todas as suas carencias, unha aposta forte polo Software Ceibe e o novo plano da Xunta ignora na sua totalidade estes temas.

É por iso que por toda a rede están a se mobilizar asociacións e indivíduos para lles facer chegar aos dirixentes da Xunta o seu desacougo, e o GLUG únese a estas iniciativas co envío dunha carta Certificada á segredaría Xeral de Modernización.

O escrito foi remitido hoxe de mañá e pode ser leído de seguido:

Grupo de Usuarios de GNU/Linux da Galiza
Presidencia
presidente@glug.es
Avenida de Raxoi 15, 1º
15705 – Compostela
Galiza

Prezados responsábeis da política tecnolóxica da Xunta:

Escribolles no nome do Grupo de Usuarios de GNU/Linux da Galiza (GLUG), unha asociación cultural que leva dez anos adicada á exploración e promoción dun modelo ético, tecnolóxico e económico alternativo ao actualmente imperante no eido da informática que está a ser adoptado por numerosos países, empresas, indivíduos e entidades de índole varia en todo o planeta.

Este modelo económico representa hoxe por hoxe unha nada desprezable parte do capital movido polas empresas de tecnoloxías da información e comunicación no noso país e no estranxeiro, e a posibilidade de que Galicia desenvolva un tecido empresarial nun eido de rápido crecemento e expansión. É un modelo que pola sua propia natureza conleva un enorme retorno social e promove a industria local.

Tanto nos gobernos anteriores do Partido Popular coma no recente goberno bipartito PSOE-BNG o GLUG, facendo causa común con outras asociacións adicadas aos mesmos fins fixo un especial fincapé en, ademais de manter o seu traballo de base entre a cidadanía, se por en contacto cas autoridades competentes para lles facer ver a nosa proposta e preocupacións e se ofrecer coma interlocutor e asesor onde fixese falla. Esta dispoñibilidade foi aproveitada en diferentes graos en diferentes momentos e, en xeral, resultou moi positiva. Fixéronse adiantos que, se ben nos gustaríamos de ver mais valentes e decididos, avanzaron en xeral na dirección axeitada.

Mantendo esta liña, o GLUG está a realizar un traballo de coordinación co resto de entidades que forman a comunidade do Software Libre en Galicia para presentar un análise de situación e unha serie de propostas ao actual poder executivo que vostedes representan. Nembargante, nos últimos días veñen de suceder unha serie de feitos que alteran notablemente os tempos que tiñamos previstos para esta toma de contacto e que, achamos, fan necesaria esta carta urxente.

O pasodo 9 de xullo, o Goberno Galego aprobou un conxunto de medidas que debuxan a política tecnolóxica da Xunta ata o ano 2010. Sorpréndenos en parte este movemento, xa que existía e fora aprobado xa polo goberno anterior o Plano Estratéxico Galego para a Sociedade da Información que, cas suas carencias, recollía boa parte das nosas preocupacións, froito dun longo proceso de negociación cos diferentes sectores implicados na industria tecnolóxica do país.

Entendemos que un cambio de goberno implica necesariamente cambios no xeito de facer as cousas e polo tanto unha certa modificación das decisións de gobernos anteriores. O que non entendemos, nembargante, é que as novas decisións tomadas parezan ignorar e mesmo ir en contra do programa electoral co que o seu goberno concurriu ás eleizóns. En concreto, comprobamos con preocupación que neste plan non aparece referenciada ningunha iniciativa de promoción do Software Libre ou de continuidade das existentes (como as Oficinas de Software Libre Universitarias ou Mancomún) nin tampouco compromiso algún para implantar estándares abertos na administración electrónica da Xunta.

Un movemento decidido a favor do Software Libre na Xunta -- e na educación e administración galegas en xeral -- suporía deixar de adicar millóns de euros a mercar licenzas de aplicativos privativos que son pagadas directamente a empresas foráneas para, de xeito moito mais crítico para o noso futuro colectivo, os investir no desenvolvemento dunha industria informática xenuínamente local e autónoma que se encargase das tarefas de desenvolvemento e configuración dos aplicativos libres empregados pola administración. É preciso incidir nisto: non se trata soamente de que poderían gastar menos cartos dos contribuíntes, senón en qué se gastarían: na industria local ou no estranxeiro. Entendemos que, nos tempos de crise nos que vivimos, este retorno económico á sociedade debe de ser un movemento estratéxico fundamental que traspase cores políticos. Non se trata soamente dun posicionamento ideolóxico senón dunha causa de boa xestión e eficiencia -- ás que, debemos lembrar, están obrigadas pola Constitución Española todas as administracións públicas.

Quixeramos aproveitar esta carta que lles remitimos para incidir no feito de que o Software Libre non é soamente unha cuestión de aplicativos informáticos (Software Libre non é soamente o "linux"). A asociación que represento e aquelas que comparten o noso camiño temos unha fonda preocupación polo futuro informacional do país. Entendemos que é autoevidente para calquera persoa conectada ca actualidade tecnolóxica e económica que a sociedade na que vivimos depende nun grao moi alto do libre e eficiente intercambio de información. Este intercambio, nembargante, require de estándares e protocolos libres e abertos -- tecnoloxías aceptadas e aprobadas por organismos internacionais coma a International Standards Organization -- que son habitualmente defendidos polas asociacións e empresas asociadas ao Software Libre, pero chocan frontalmente cos intereses monopolísticos de negocios que históricamente tiveron o control sobre de qué xeito se transferían e se almacenaban os datos.

Neste senso, en Europa e no mundo está a se loitar unha batalla burocrática e legal pola estandarización e o consenso na que é vital que os gobernos se impliquen. Afortunadamente, tanto a Comisión coma o Parlamento Europeos, así como as Nacións Unidas e o propio Goberno do Reino de España coinciden en identificar as tecnoloxías libres e os estándares libres e abertos coma os únicos garantes da interoperabilidade.

Exposto o anterior concluirá que a ausencia de calquera referencia ao Software Libre, estándares e tecnoloxías e casúistica asociadas no plano que veñen de presentar nos preocupe de xeito notable a nos e a un grande número de persoas da sociedade galega. Pensamos que é urxente que o seu goberno emita un comunicado aclarando cal é o seu posicionamento sobre estes temas e, aínda mais necesariamente, que corrixan o plano do día 9 de Xullo para reflexar o grao de implicación que a administración que vostedes representan vai a asumir ao respecto, tanto mais cando lemos expresamente no programa electoral co que concurriron ás pasadas eleccións o seguinte:

«[O Partido Popular comprométese ao] Impulso da implantación de software libre e uso de estándares abertos na Administración Autonómica, compartindo e reutilizando o software que fose creado con diñeiro público, sen posicións dogmáticas fronte a catro anos de bipartito de impulso teórico e enchido de adxudicacións de software privativo»

Quixera rematar esta carta poñéndome a min e á miña asociación á disposición das consultas que nos queiran facer sobre calquera destes temas, por correo electrónico, carta ou entrevista -- tanto nos coma calquera outro ente implicado no mundo do Software Libre en Galicia estará seguramente encantado de lles prestar a axuda da que precisen para ter unha visión cabal da situación que vivimos.

En Santiago de Compostela, a 15 de Xullo do 2009, fico á sua disposición,

Denís Fernández Cabrera,
Grupo de Usuarios de GNU/Linux da Galiza,
Presidente.